زلزال في أوضة اللبس.. خناقة شوارع بين نجوم الأهلي بعد صدمة الترجي
زلزال في أوضة اللبس.. خناقة شوارع بين نجوم الأهلي بعد صدمة الترجي
“اتهامات وخناقات في أوضة اللبس”.. تفاصيل مشادة لاعبي الأحمر بعد فضيحة الخروج الافريقي
الأجواء جوه أوضة لبس الأهلي بعد الماتش كانت “جحيم”، والحزن مكنش صامت، ده تحول لـ خناقة واتهامات متبادلة بين اللاعيبة وبعضهم. حالة من الذهول سيطرت على الكل، والكلمة اللي كانت بتتردد بـ “غل”: “كان ممكن نخلص الشوط الأول كسبانين 4 مستريح!”. اللاعيبة دخلوا في نوبة لوم عنيفة، وشايفين إن الفريق ضيع فوز تاريخي كان في المتناول، وبدل ما نحتفل بالتأهل، بقينا بندور على شماعة نعلق عليها “فضيحة القاهرة” والهروب من شبح الخروج.
السهام كلها اتوجهت لـ خط الدفاع اللي كان “شوارع” قدام لاعيبة الترجي؛ اللاعيبة حملوا المدافعين مسؤولية الأهداف التلاتة اللي سكنت الشباك بسبب أخطاء ساذجة وسرحان كلف النادي غالي. وفي المقابل، المدافعين مردوش بالسكات، وفتحوا النار على المهاجمين بسبب “رعونة إهدار الفرص” اللي كانت كفيلة تنهي الماتش من بدري. الاتهام الأكبر كان “انعدام الالتزام بالواجبات الدفاعية” من نص الملعب والأجنحة، اللي سابوا الدفاع في مواجهة مباشرة مع طوفان الترجي، وكأن كل واحد بيلعب لنفسه مش للكيان.
اللي حصل النهاردة بيكشف إن “الروح” غايبة تماماً، وإن الفريق مفكك لدرجة إن اللاعيبه بيحملوا بعض المسؤولية قدام الكاميرات وفي الكواليس. خسارة 3-2 في القاهرة هي نتيجة “كارثية” بكل المقاييس، وبتحط الفريق في موقف م يحسدش عليه قبل ماتش العودة. هل “خناقة أوضة اللبس” دي هتكون بداية لتصحيح المسار والاعتراف بالغلط، ولا الشق بقى أكبر من الرقعة والجيل ده خلاص جاب آخره؟ ليلة القاهرة بتبات بـ “خسارة وكسرة نفس” واتهامات م بتخلصش.
كأس العالم لكرة القدم 2026
من 11 يونيو إلى 19 يوليو
