حازم إمام يصف نجم الزمالك بأنه رقم 1 في المنتخب!

15 نوفمبر، 2025

9 405 دقيقة واحدة

تصريح النجم حازم امام

أحمد فتوح بيقدّم شكل مختلف تمامًا عن أي ظهير تاني في مصر الفترة دي.. الراجل لما بيكون حاضر ذهنيًا ومركز، بتحس إن عندك لاعب جاهز ينافس على أعلى مستوى في القارة كلها، مش بس الدوري المصري.. موهبة خام محدش يقدر يختلف عليها… المشكلة كانت دايمًا في العقلية، وواضح إن الحكاية دي بدأت تتظبّط.

نزول فتوح ماتش امبارح كان نقطة تحوّل، أول ما لمس الكورة حسيت إن الجبهة الشمال اتفتحت من أولها لآخرها.. خلصان، بيعدي، بيرقص، بيفك ضغط، وبيديك حلول هجومية ما كانتش موجودة قبل ما يدخل.. النوع اللي يغير إيقاع مباراة في دقيقة.

العرضيات؟ موضوع تاني خالص.. كل كرة طايرة منه لها عنوان… تحس إنه راجع بشراسة وتركيز مختلفين، ده مش فتوح اللي كان بيعدي عليه وقت من غير ما يحس هو رايح فين… ده لاعب واعي، مركز، وعايز يثبت نفسه قبل أمم أفريقيا بأي طريقة.

الأهم بقى هو ذكاء الملعب اللي ظهر عنده.. في مصر عندنا باكات كتير سريعة ومهارية، بس قليل اللي بيعرف يتحرك صح ويقرأ اللعبة قبل ما تحصل… وده اللي ميّز فتوح عن أي ظهير تاني في الدوري.. هو حرفيًا عامل فرق كبير بين المحلي والدولي، وده اللي يخليك مطمن إنه قادر يقف على مستوى بطولة قارية.

ولو فضّل ماشي على نفس الالتزام والتركيز، فتوح قدامه فرصة يبقى الظهير رقم واحد في أمم أفريقيا… ويمكن في القارة كلها، مش ناقصه غير إنه يمسك الفرصة المرة دي ومايسيبهاش تهرب منه زي قبل كده.. كل المؤشرات بتقول إننا قدّام نسخة أنضج، أقوى، وأكتر جاهزية من أحمد فتوح.