الأهلي يقترب من صفقة نارية.. المهاجم الكونغولي على الأبواب!
الأهلي يقترب من صفقة نارية.. المهاجم الكونغولي على الأبواب!
لسه فاكرين جاكسون موليكا؟ المهاجم الكونغولي صاحب الـ25 سنة، اللي سبق ولعب مع بشكتاش التركي وبعدها مع الخلود السعودي، وكان دايمًا اسمه من أبرز الترشيحات اللي بتظهر في كل سوق انتقالات مرتبط بالأهلي.
القصة بدأت لما خرج من بشكتاش معارًا للخلود مع وجود بند أحقية الشراء، وبمجرد ما الفريق ضمن البقاء في الدوري السعودي قرروا تفعيل البند.. لكن المدرب الجديد ما اقتنعش بيه وقرر استبعاده من معسكر الإعداد في تركيا، الأمر اللي خلى موليكا يفسخ عقده ويصبح لاعب فري دلوقتي.
وعلى الرغم من إن فترته الأخيرة مكنتش مثالية، إلا إنه نجح الموسم الماضي في تسجيل 12 هدف في الدوري السعودي وسط زحمة النجوم والأسماء العالمية.. أرقامه تثبت إنه مهاجم عنده قيمة، خاصة مع سرعاته الكبيرة وتحركاته داخل منطقة الجزاء وقدرته المميزة على التسجيل بالرأس.
موليكا مش مجرد مهاجم صندوق، ده لاعب سريع جدًا يتفوق على أغلب مدافعي الدوري، وكمان عنده مهارة فردية تخليه يشتغل كجناح بنفس الكفاءة.. يعني تقدر تعتمد عليه في أكتر من دور هجومي، سواء خلق فرص أو إنهاء الهجمات بنفس الجودة.
لو الأهلي بيدوّر على مهاجم مضمون النجاح تقريبًا، فأنا شايف إن موليكا هو الخيار الأمثل.. عمره 25 سنة بس، يعني قدامك خمس مواسم كاملة تقدر تستفيد منه، وكمان مش هتدفع غير راتبه.. وبصراحة، لو الأهلي فكر يسيب مكان أجنبي بخروج داري بعد تألق ياسين مرعي، وعاوز يعوض رحيل وسام بمهاجم تقيل.. يبقى موليكا الحل الأنسب بلا منازع.
