غير مصنف
مصطفى عبده يفجرها: الأهلي يفشل في التعاقد مع مدرب عالمي ويستعين بـ”الطير المهاجر”!
مصطفى عبده يفجرها: الأهلي يفشل في التعاقد مع مدرب عالمي ويستعين بـ"الطير المهاجر"!
أوضح الكابتن مصطفى عبده في تصريحاته على قناة الأهلي أن إدارة النادي لم تستقر بعد على مدرب أجنبي يلبي طموحات الجماهير. وأشار إلى أن معظم المدربين الأجانب مرتبطون بأندية أخرى مع بداية الموسم، مما صعّب على الأهلي إبرام أي صفقة ناجحة. وأضاف عبده أن هذا الواقع يجعل النادي مضطرًا للاستعانة بمدرب مصري يمتلك خبرة كبيرة. وأكد أن الخيار المصري يأتي لضمان استقرار الفريق وتحقيق النتائج المرجوة. الجماهير تنتظر إعلان الإدارة الرسمي خلال الأيام المقبلة.
وصرح ان حسام البدري بالنسبة ليا هو رجل المرحلة في الأهلي.. راجل عنده خبرات كبيرة جدًا سواء لما كان مدير فني أو حتى مساعد مع مانويل جوزيه.. ودي نقطة مهمة، لأنه عاش تفاصيل الجيل الذهبي وعارف كويس يعني إيه إدارة نجوم كبار والسيطرة على أوضة اللبس.. والميزة الأهم إنه مش بيخاف يبعد أي لاعب مهما كان اسمه أو نجوميته لو مصلحة الفريق محتاجة كده.
كمان في نقطة لازم نفكر فيها.. كل الدوريات بدأت خلاص، يعني المدربين الكبار مش متاحين دلوقتي بسهولة.. وأي مدرب أجنبي هييجي هيحتاج وقت طويل عشان يتأقلم ويفهم اللعيبة ويفرض أسلوبه، وده وقت الأهلي مش عنده رفاهية يضيعه.. إنما حسام البدري يقدر يديك نتائج سريعة من أول أسبوع لأنه ببساطة عارف البيت من جوة.
غير كده، الراجل مدرك قيمة الميركاتو الأخير للأهلي وفاهم كويس إن السكواد الحالي مليان نجوم وصفقات تقيلة. وده يخليه قادر يطلع من الفريق أفضل نسخة ممكنة من غير ما يضيع وقت في التجارب أو اكتشاف قدرات اللعيبة.
ولو بصينا على الأسماء المطروحة، هنلاقي إن أغلبها مش “Clásse A” ومفيش اسم تقيل يملأ العين.. يمكن الوحيد اللي ممكن يفرق هو كارلوس كيروش، لكنه مرتبط حاليًا مع منتخب عمان ومش متاح غير بعد فترة التوقف القادمة.. يعني البدري واقعيًا هو الحل الأقرب والأسرع.
الأهلي دلوقتي داخل على دوري صعب جدًا، المنافسة فيه قوية وغير متوقعة، ومع عينه كمان على دوري أبطال أفريقيا. في الظروف دي محتاج مدرب يعرف يكسب من دلوقتي مش بعد شهور.. والحل الأنسب والأضمن هو حسام البدري.
